GENERAL SANTOS CITY – Personal nga bangi ang usa sa gitutukang anggulo sa San Isidro Police Station ang natigayong pagpamusil sa ilang area of responsibility kung asa ang biktima usa ka miyembro sa LGBT.
Gikabutyag nga gipaabot pa ang resulta gikan sa crime lab sa mga basiyo sa bala nga narekober sa crime scene.
Kahibaluan nga ang biktima giilang si Reynald Estrada, 37 anyos, residente sa Habitat Phase A Brgy Mabuhay ning dakbayan.
Nasayran nga una ang insidente, usa ka lalaki ang misulod sa ilang compound ug gipangita ang usa ka Boyet.
Nadunggan na lamang matud pa ang mga buto sa pusil human gipangutana sa suspek ang biktima.
Gilayon matud pang misibat ang suspek sakay sa iyang motorsiklo nga kulay itum ug puti ug paspas nga misibat.
Nakaangkon ang biktima ug ubay-ubay ka mga samad-pinusilan nga maoy hinungdan sa iyang kamatayon.
Kasamtangan pang gapangalap ug dugang imposmasyon ang kapulisan aron mailhan ang suspek.
