Gikumpirma sa Davao regional police nga usa ka miembro sa Kingdom of Jesus Christ (KOJC) ang namatay atol sa operasyong gipahigayon dihang gi-serve sa kapin sa dos-mil ka mga pulis ang arrest warrant batok kang Pastor Apollo Quiboloy og sa mga kaubanan niini sa compound sa maong relihiyosong grupo.
Subay sa taho, sumala sa Police Regional Office (PRO) Region 11 nga usa ka lalaking miyembro sa KOJC ang nakabsan sa kinabuhi human nga giatake sa kasingkasing.
Namatay ang nasampit atol sa pag-serve sa arrest warrant sa KOJC compound nga nahimutang sa Buhangin District, Davao City.
Matod ni P/Brig. GeneraL Nicholas Torre II, ang namatay nga lalaki ang gideklara nga ‘dead on arrival’ sa ospital.
Naka-standy sa karon ang mga ambulansya aron maghatag ug assistance alang sa mga tawo nga supporters ni Quiboloy nga naa sa gawas og sa sulod sa KOJC compound.
Matod ni Torre, adunay 42 ka gambalay sa KOJC compound nga ang usa niini, lima ka ektarya ang gilapdon.
Gibtuyag niini nga duha ka warrant of arrest ang ilang gi-serve.
Kahinumduman nga tumong sa kapulisan nga mag-serve og arrest warrant kang Quiboloy kaniadtong Hunyo 10, 2024 sa Davao City og sa maong higayon, adunay gipanggamit pa nga mga hagdanan nga gikasuko usab sa mga supporters ni Quiboloy nga nagahulat sa gawas.
Ang maong self-proclaimed appointed son of god ang nag-atubang sa kaso nga paglapas sa Section 5(b) sa Republic Act 7610 ukon Special Protection of Children Against Abuse, Exploitation, and Discrimination Act og Section 10(a) sa maong balaud.
Nag-atubang usab si Quiboloy og non-bailable Qualified Human Trafficking charge ilawom sa Republic Act No. 9208 sa Pasig court apan gipanghimakak kining tanang mga akusasyon kaniya.
