GENERAL SANTOS CITY – Kasamtangan unang gikustodiya sa Bureau of Internal Revenue-12 partikular sa Revenue District 18 sa Koronadal City ang minilyon ka pesos nga kantidad sa mga sigarilyo nga ilang nakumpiska miaging semana kauban ang Bureau of Customs dinhi sa siyudad, human napamatud-an nga peke ang tax stamp.
Giklaro ni Esmeralda Tabuli, Director sa BIR-12 nga dili ang sigarilyo nga gipanag-iyahan sa Mighty Corporation ang peke, inay ang tax stamp niini, kung asa minilyon ka pesos ang nalutsan sa gibayran nga buhis sa naasoy’ng kumpanya ngadto sa gobyerno.
Sa pagkakaron padayon matud pang gina-ihap kon gina-estima sa BIR-12 ang kinatibuk-ang kantidad sa sigarilyo nga ilang nakumpiska, kung asa una nang gibutyag sa BoC nga gibanabanaang mukabat kini sa P250 milyon.
Kini alang usa sa pagdokumento ug sa angayang himuong lakang batok sa consignee sa nakumpiska nga sigarilyo.
Samtang, gibutyag usab sa BIR-12 nga may pipila pa ka mga tindahan ug bodega sa sigarilyo ang gikatakda nilang rondahon, may kalabutan sa paggukod sa mga sigarilyo nga may peke nga tax stamp.
