Mahimong maatubang og permanente nga pagdili sa pagdumala og posisyon sa gobyerno ang usa ka opisyal nga mapamatud-ang nag-awhag sa laing tawo nga mohimo og perjury o pagsulti og bakak ubos sa panumpa, sumala ni Sen. Panfilo “Ping” Lacson.
Matod ni Lacson, mahimong isipon nga principal sa krimen ang usa ka tawo nga direktang nag-awhag sa uban sa paghimo og perjury, pinasikad sa mga probisyon sa Revised Penal Code (RPC) bahin sa conspiracy ug sa mga principal sa krimen.
Gipasabot sa senador nga sumala sa Article 8 sa RPC, adunay conspiracy kung duha o kapin pa ka mga tawo ang nagkasinabot sa paghimo og krimen ug nakahukom nga ipatuman kini.
Samtang, ubos sa Article 17, lakip sa giisip nga principal ang mga tawo nga direktang nagpugos o nag-awhag sa uban sa paghimo og krimen.
Tungod niini, giingon ni Lacson nga posibleng mapasakaan og reklamo tungod sa subornation of perjury sila Sen. Rodante Marcoleta ug kanhing Rep. Michael Defensor, may kalabotan sa giingong “coached” nga testimonya sa kanhing Marine nga si Orly Guteza.
Matod niya, base sa mga rekord sa Senate Blue Ribbon Committee, matud pa gipangulohan ni Marcoleta ang paggiya kang Guteza kung unsay angay niyang isulti sa iyang affidavit atol sa pagdungog sa komite niadtong Septiyembre 2025.
Sa ulahi, gibawi ni Guteza ang iyang unang pamahayag ug giakusahan sila Marcoleta ug Defensor nga nag-awhag kaniya sa pagtestigo isip balos sa kuwarta ug scholarship alang sa iyang mga anak.
Apan, ang maong mga pamahayag mga alegasyon pa lamang nga kinahanglan mapamatud-an pinaagi sa hustong proseso.
Matod ni Lacson, lakip sa posibleng makapasaka og reklamo ang Department of Justice o DOJ ug Office of the Ombudsman, tungod kay ang perjury giisip nga public offense.
Gawas sa posibilidad nga adunay mga kasong kriminal, giingon usab ni Lacson nga plano niyang magpasaka og panukalang balaod aron pataason ang mga silot ug multa batok sa subornation of perjury.
Tumong niini nga mas pabug-aton ang panubag sa mga tawong naggamit sa ilang posisyon o impluwensya aron awhagon ang uban nga mamakak ubos sa panumpa.
Samtang, nagdepende gihapon sa imbestigasyon ug sa hustong proseso kon adunay igo nga basihan aron mapasakaan og kaso ang bisan kinsa nga nalambigit sa alegasyon sa subornation of perjury.
