Dako nga pribilehiyo para sa mga negosyante sa merkado publiko ang panahon sa mga holiday sama sa Kalag-Kalag tungod kay mas taas ang ilang kita ug daghan ang mamalitay sa ilang mga baligya.
Sumala ni Aljun, usa ka tindero sa merkado publiko, dako ang kalipay nila sa maong panahon kay ubay-ubay ang mga tawo nga mamalit, ilabi na sa pagkaon, kandila, bulak, ug uban pang gamit nga kasagarang gikinahanglan sa pagbisita sa mga sementeryo. Giingon pa niya nga kini nga mga adlaw usa ka oportunidad alang sa mga negosyante nga makadugang sa ilang panginabuhi.
Dugang pa ni Aljun, bisan pa man sa kakapoy ug kalisod sa pagserbisyo sa daghang mamalitay, mapasalamaton gihapon sila tungod kay ang Kalag-Kalag naghatag kanila og kusog nga halin ug oportunidad nga makabawi sa ubang mga panahong hinay ang negosyo.
