Gianunsyo sa Philippine National Police (PNP) kagahapon nga ang mga menor de edad nga nadakpan atol sa bangis nga mga protesta batok sa korapsyon kaniadtong Setyembre 21 kinahanglan nga ipaubos sa rehabilitasyon ug pagtambag.
Matod ni PNP acting chief Lt. Gen. Jose Melencio Nartatez Jr., 55 ka mga menor de edad ug 25 ka mga hamtong nga nasikop ang gibuhian subay sa balaod, partikular na ang Juvenile Justice and Welfare Act.
Si Manila Mayor Isko Moreno niingon nga ang mga menor de edad kinahanglang dad-on sa Manila Department of Social Welfare aron mopahigayon og community service sama sa cleanup drives isip kabahin sa ilang rehabilitation, reintegration, ug diversion.
Gihingusgan ni Nartatez nga importante ang tulubagon, apan angay usab nga hatagan og pagtagad ang tukmang giya ug rehabilitasyon sa mga batan-on.
Giawhag usab sa PNP ang mga ginikanan, guardian, ug lokal nga opisyal nga mahimong aktibo sa paggiya sa mga batan-on aron malikayan ang susamang mga insidente sa umaabot.
Sa bahin sa 25 ka mga hingkod nga nadakpan, si Nartatez nimando nga ang mga imbestigador makig-alayon og maayo sa mga piskal aron masiguro ang tukmang pagpasaka sa mga kaso.
