GENERAL SANTOS CITY – Dako ang pagtuo ni Nelson Montecillanos nga taga Lun Padidu, Malapatan Sarangani nga kuwarta sa mga investors ang giaplit ni Eugene Naungayan sa dos andanas nga dakong balay sa Caceres Subd, San Isidro ning siyudad.
Matud pa ni Montecillanos, sa iyang pagkahibalo nga kini ang ikaduhang balay nga napalit ni Naungayan gamit ang kuwarta gikan sa mga nag-invest sa PPM scam.
Gibutyag pa niini, namroblema siya pagkakaron tungod siya ang gipaninglan karon sa mga na-recruit niya sa Lun Padido apan wala sa iyaha ang kuwarta kun dili gitunol niya kang Eugene.
Hinuon, giangkon nga may ebidensya na silang gihuptan sa gipasakang kaso kang Naungayan nga padayong nagtagotago pagkakaron og dili na usab nila makontak.
Dismasyado si Montecillanos og uban pang mga biktima tungod gihimo na matud pa nila ang tanan apan nabalewala na lang human nga gibuhian sa kapulisan ang mga taong pwede matud pa makatudlo kung asa ang gihimutangan karon ni Naungayan.
Giangkon pa niini nga miabot nga midangop na sila sa Office of the President didto sa Panacan, Davao kung asa nagtagbo sila sa NBI apan wala pay aksyon pagkakaron.
Samtang bisan pa nagpasaka na ug kasong syndicated estafa sa NBI SARDO batok kay Naungayan og kang Shiela Agustin, tulo ka semana na ang nakalabay apan wala pa gihapon gipagawas nga warrant of arrest.
