Hugtanong gipanghimakak sa Armed Forces of the Philippines ang mga bag-o na usab nga mga alegasyon sa China batok sa Pilipinas.
Kini ang gihingusgan sa AFP human sa pagpagawas ug video sa China nga nag-akusa sa mga tropa nga nakabase sa BRP Sierra Madre sa pagpanutok matud pa ug mga armas batok sa mga sakop sa China Coast Guard sa bahin sa Ayungin Shoal.
Gipaklaro ni AFP public affairs office Chief Col. Xerxes Trinidad, wala gitutukan ug mga armas kun dili naka-alerto lamang o ‘on guard’ ang mga tropa sa BRP Sierra Madre tungod sa presensya sa China Coast Guard duol sa maong military outpost sa lugar.
Gipaklaro niya, standard operating procedure sa tropa nga gilayong magpatuman ug heightened alert ug mas hugot nga magbantay sa matag makaangkon ug mga foreign vessel nga muduol sa Brp Sierra Madre ug mulapas usab sa safe distance protocol niini.
Dungan niini subling gihingusgan sa AFP nga ang tibuok han-ay sa kasundalohan ang gidumalahan sa rules of engagement ug klaro nga milihok nga adunay pinakataas nga lebel sa propesyunalismo, ug disiplina partikular na sa paghimo sa ilang misyon nga panalipdan ug protektahan ang soberanya ug katungod sa soberenya sa Pilipinas ug bisan ang katungod sa mga Pilipino batok sa unsa mang matang sa bahad.
Alayun niini subli usab nga gihingusgan sa AFP ang ilang commitment sa pagpabilin sa kalinaw ug istabilidad sa tibuok rehiyon subay usab sa direktiba ni Pangulong Ferdinand Marcos Jr.
