GENERAL SANTOS CITY – Aminado si Mayor Ronnel Rivera nga dismayado siya sa natigayong komosyon sa Dolores Tropicana Beach Resort nga anaa sa Brgy. Tambler ning syudad kaniadtong Sabado.
Sa eksklusibong pakighinabi sa Bombo Radyo, gibutyag sa mayor nga mikuha ug permiso si Romuald Ambito ang Events and Promotion Officer sa Tropicana Worldwide Corporation gibalibaran tungod kasupakan kini sa gipagawas niining Executive Order Number 13.
Gani gibasura ni Executive Assistant to the Mayor Dave Areglado ang sulat ni Ombito.
Matud sa mayor wala siya magdahum nga gipadayon sa organizer ang reggae night jam sa maong kaliguanan luyo nga wala gitugtan.
Base sa nakit-an niining video, tataw nga walay social distancing ang mga beach goers og nakasupak usab sa curfew nga gipatuman sa syudad tungod nasuta nga pasado ala una na sa kaadlawon dihang nagsugod ang kasamok.
Giklaro ni Mayor Rivera nga wala gi-tolerate ang panghitabo bisan pa panag-iya sa ilang pamilya ang maong kaliguanan hinungdan nga gilayong gimando sa City Business Permits and Licensing Division ang temporaryong pagpasirado niini.
Sa pamahayag pa sa mayor, ang pag-abli balik sa publiko sa beach resort mudepende sa desisyon sa IATF human ang ilang tubag sa gihatag niining show cause order.
Gihingusgan sa mayor nga seryso ang syudad sa COVID response apan gihangyo ang hugot nga kooperasyon sa tanang katawhan sa GenSan pinaagi sa pagsunod sa health protocol.
