Patay ang usa ka 47-anyos nga babaye samtang naangol ang iyang live-in partner human sila giatake sa wala pa mailhing suspek sa usa ka pagpangdunggab sa Purok 2-C, Namnam, San Fernando Bukidnon, pasado alas 5:15 sa buntag, kagahapong adlawa, Marso 4, 2026.
Sumala sa otoridad nadawat sa kapolisan ang tawag gikan sa usa ka concerned citizen pasado alas 7:15 sa buntag bahin sa insidente.
Pag-abot sa mga operatiba sa lugar, nakit-an ang babayeng biktima nga naghigda sa daplin sa karsada duol sa iyang itom nga motorsiklo nga adunay dakong samad sa tiyan.
Ang iyang kapikas nga lalaki, nga adunay samad sa mga bukton, gidala na dayun sa balay tambalanan ug karon anaa sa maayong kahimtang.
Base sa imbestigasyon, sakay ang magtiayon sa ilang motorsiklo pauli sa Purok 3, Namnam sa dihang kalit mitungha ang suspek gikan sa tuo nga bahin sa dalan ug giatake sila gamit ang sundang, dayon mikalagiw padulong sa wala mahibal-an nga direksyon.
Nagpadayon ang hot pursuit operation sa San Fernando Municipal Police Station uban sa 1003rd Maneuver Company, RMFB 10 aron mailhan ug madakpan ang suspek, samtang padayon pang gisusi ang motibo sa krimen.|via. Bombo Radyo Malaybalay
