Nipasalig ang Palasyo sa Malacañang paminawon ug tun-an pag-ayo ni Presidente Ferdinand Marcos Jr. ang bisan unsang isyu nga may kalabotan sa Connected Pinoy Bill sa dili pa niya kini pirmahan aron mahimong balaod.
Matod ni Palace Press Officer USec. Claire Castro, hangtod karon wala pay nadawat nga mga dokumento ang Presidente kalabot sa maong balaudnon.
Gihimug-atan ni Castro nga mohimo gyud og ebalwasyon ang Presidente partikular na ang mga probisyon nga anaa sa nasangpit nga balaudnon ug masiguro nga makahatag kini og kaayohan sa atong mga katagilungsod.
Ang pamahayag ni Castro tungod sa panawagan sa mga Telco operators nga kinahanglang i-review sa Presidente ang Connected Pinoy Bill tungod kay pipila sa mga probisyon nga anaa sa maong balaodnon adunay negatibong epekto nga makadaot sa nasudnong seguridad ug implikasyon sa patas nga kompetisyon.
