Niluwat ang Land Transportation Office (LTO) og show cause order batok sa inilang babaye nga motorcycle vlogger nga si “Yanna” human kini mitunglo ug mipakita og dirty finger sa usa ka pick-up driver sa Zambales.
Matod ni LTO Chief Vigor Mendoza II, ilang gitan-aw kung angay bang suspindihon o bawion ang lisensya ni Yanna tungod sa pagka “improper person to operate a motor vehicle.”
Si Yanna adunay 435,000 ka followers sa social media.
Base sa viral video nga gi-review sa LTO, si Yanna nipakita sa iyang dirty finger sa pick-up driver nga iyang gipasanginlan nga reckless driving. Nag-atubangay ang duha ug nagbinayloay og masakit nga mga pulong, bisan human nangayo og katin-awan ang lalaki.
Ang LTO niinsistir nga, isip influencer, gigamit unta ni Yanna ang iyang plataporma sa pagpasiugda og responsableng pagdrayb ug kaluwasan sa kadalanan.
Bisan og nangayo na og pasaylo ang vlogger, ipadayon gihapon sa LTO ang imbestigasyon.
