Giduso ni Parañaque 2nd District Rep. Brian Yamsuan ang House Bill 7868 nga nagtumong sa paghimo og long-term plan aron matubag ang kakulang sa mga libro sa mga pampublikong eskwelahan ug masiguro nga ang mga materyales sa pagkat-on updated ug angay sa mga panginahanglan sa mga estudyante.
Ubos sa balaodnon, ang Department of Education (DepEd) ug ang National Book Development Board (NBDB) magtinabangay sa paghimo og National Textbook and Learning Resources Plan nga magtakda og mga palisiya aron masiguro ang igong suplay sa mga libro ug regular nga susihon kini matag lima ka tuig.
Gisugyot usab ni Yamsuan ang pagpalapad sa pag-imprinta og libro sa lebel sa rehiyon kung mahimo, aron mapalambo ang produksiyon sa Visayas ug Mindanao. Apil usab sa balaodnon ang hinay-hinay nga pagbalhin sa pagmantala ug pag-apod-apod sa libro ngadto sa pribadong sektor sulod sa tulo ka tuig, samtang ang NBDB ang momonitor niini.
Apil usab sa balaodnon ang pag-ila sa mga elektronik nga publikasyon isip mga libro, paghimo og mga materyales para sa mga estudyante nga adunay mga kakulangan, ug pagtukod og mga Textbook Review Committee aron masiguro ang kalidad ug kaangayan sa mga libro nga gamiton sa mga pampublikong eskwelahan.
Sumala ni Yamsuan, ang pagbaton og igo ug dekalidad nga mga libro importante aron madugangan ang kahanas sa mga estudyante sa pagbasa ug matubag ang dugay nang problema sa kakulang sa mga materyales sa pagkat-on sa mga pampublikong eskwelahan.
