GENSAN- Gipahayag ni P/Maj. Mark Gerard Norbe, operation officer sa RACU 12 ang iyang suporta sa gisugyot nga mga balaod nga magtakda og limitasyon sa paggamit sa social media sa mga menor de edad.
Matud ni Norbe, ang maong lakang mahimong makatabang alang sa kaayohan ug proteksyon sa mga kabatan-onan, ilabi na sa panahon nga nagkadaghan ang mga hagit nga dala sa digital platforms.
Sumala kaniya, mas napadayag ang epekto sa online platforms panahon sa pandemya diin daghang tawo ang napugos sa paggamit sa internet tungod sa pagbalhin ngadto sa online setup.
Gani, iyang giingon nga importante nga makaangay ang katilingban sa nagbag-o nga palibot ug suportahan ang mga lakang nga maghatag og mas luwas nga paggamit sa teknolohiya alang sa mga bata.
Gidugang ni Norbe nga ang mga gisugyot nga balaod nga gipasa sa mga magbabalaod angay nga suportahan tungod kay gitumong kini alang sa kaayohan sa tanan, ilabi na sa mga menor de edad.
