Magpahigayon ang Department of Tourism og libre nga watch party alang sa mga fans sa SB19 aron sabay-sabay nilang tan-awon ang makasaysayanong pasundayag sa P-pop group sa Lollapalooza Chicago.
Pagahimoon ang watch party sa Hulyo 31 sa Rizal Park Open Air Auditorium sa Maynila. Libre ang pagsulod, apan gikinahanglan ang online registration aron makasulod.
Ablihan ang venue sa alas-1:30 sa kaadlawon, diin adunay listening party ug pre-show program sa dili pa magsugod ang livestream sa performance sa alas-4:00 sa buntag.
Hinumdoman nga bag-o lang gitudlo ang SB19 isip bag-ong Tourism Ambassadors sa DOT.
Ang SB19 usab ang unang Filipino group nga mosalmot sa prestihiyosong Lollapalooza Music Festival sa Chicago.
Gawas niini, nakatakda usab ang grupo nga mosalmot sa Grammy Museum Global Spin Live, ug sila usab ang mopahigayon sa ceremonial first pitch sa duwa tali sa Chicago White Sox ug New York Yankees.
Samtang, alang sa mga dili makatambong sa watch party, mahimo usab nilang tan-awon ang performance sa SB19 sa Lollapalooza pinaagi sa streaming platform.
Human sa ilang mga kalihokan sa Estados Unidos, mopadayon ang SB19 ngadto sa Japan alang sa Summer Sonic Festival sa Agosto ug sa KPOPWORLD Festival sa Texas sa Oktubre.
