GENSAN- Nanawagan ang lokal nga panggamhanan sa General Santos City sa publiko nga suportahan ang redevelopment sa Central Public Market, isip usa ka dakong lakang aron mapadayon ang kalamboan sa syudad nga nagpadayon sa pag-uswag.
Matud ni City Administrator Shandee Llido Pestaño, kabahin kini sa long-term vision sa syudad nga anam-anam nga makaangkon ug tinuod nga kalamboan ang dakbayan.
Bisan pa man sa pipila ka kabalaka sa ubang sektor kabahin sa maong proyekto, gipasalig sa panggamhanan nga walay korapsyon ug walay dili maayo nga buhat nga mahitabo. Ang maong redevelopment project kantidad og P2.3 billion nga dakong kapital gikan sa private partner nga Robinsons Land Corporation, diin ang gasto sa konstruksyon sa bag-ong building dili mo-adto sa LGU.
Gibutyag ni Pestaño nga ang pondo gamiton lamang alang sa pagtukod ug pagmodernize sa palengke ug mga pasilidad niini, dili alang sa bisan unsang lain nga buluhaton.
Nakasabot ang lokal nga panggamhanan nga adunay pipila ka negosasyon ug dili uyon sa sinugdanan, apan gibutyag usab nga karon ang husto nga panahon aron mabag-o ang palengke aron kini makatindog nga dungan sa uban pang mga lugar sa syudad nga nag-asenso.
Gipunting usab niya nga ang modernisasyon makahatag ug mas limpyo, mas luwas ug mas episyenteng lugar sa negosyo alang sa mga vendors ug mamalitay.
