GENSAN- Gisuportahan ni City Administrator Shandee Llido Pestanio ang pagbutang og opisyal nga post o pahibalo kalabot sa budget sa pagkaon nga gigamit sa City Hall, isip kabahin sa pagpalig-on sa transparency sa lokal nga panggamhanan.
Sumala kang Pestanio, mas maayo nga ipakita sa publiko ang detalye sa paggasto aron makita kung giunsa paggamit ang pondo sa syudad. Matod pa niya, kini magpakita nga ang Local Government Unit o LGU abli ug matinud-anon sa pagdumala sa kwarta sa katawhan.
Gipasabot sa city administrator nga ang budget sa pagkaon dili lamang para sa selebrasyon sa Kalilangan Festival, kundili lakip usab ang pagkaon nga ginagasto para sa lain-laing programa ug aktibidad sa nagkalain-laing departamento sa City Hall sulod sa tibuok tuig.
Apil sa mga ginagastuhan ang pagkaon nga kauban sa venue ug hotel accommodation sa mga opisyal nga kalihokan, miting, seminar, workshop, ug ubang opisyal nga panagtigum nga ginatambongan sa mga opisyal ug empleyado sa syudad.
Sakop usab sa maong budget ang suporta sa seguridad atol sa mga pista ug dagkong aktibidad sa dakbayan, lakip ang pagkaon sa mga personnel nga nagbantay aron masiguro ang kalinaw ug kahapsay sa matag kalihokan.
