Nakapahimutang og bag-ong Guinness World Record ang usa ka kite enthusiast sa Australia human niyang mapabiling nakapalupad ang iyang saranggola sulod sa kapin 26 ka oras.
Si Angus Johnstone nga taga-Kyneton, Australia, maoy nakab-ot ang rekord alang sa longest kite flight by an individual human mapalupad ang saranggola sulod sa 26 ka oras, 15 minutos ug 15 segundos.
Gipahigayon niya ang record attempt sa Killarney, Victoria, diin migamit siya og asul ug lila nga saranggola isip kabahin usab sa usa ka fundraising campaign alang sa mga panginahanglanon sa panglawas ug edukasyon sa Myanmar.
Nagsugod si Johnstone sa pagpapalupad sa saranggola sa buntag sa Marso 14 ug nahuman sa misunod nga adlaw, diin gisugat siya sa pagdayeg ug pakpak sa iyang mga supporter human niyang makab-ot ang rekord.
Dili sayon ang maong kapin 26 ka oras nga hagit tungod kay kinahanglan niyang pangitaon ang lugar nga adunay padayon nga hangin, bantayan ug kontrolon ang saranggola, ug magpabiling nagmata sulod sa kapin usa ka adlaw.
Gibantayan usab ang iyang record attempt sa 10 ka official observers ug duha ka timekeepers aron masiguro nga masunod ang tanang kinahanglanon alang sa opisyal nga pagrekord.
