GENERAL SANTOS CITY – Kasuhan na ning adlawa ang duha ka mga babaye nga nasikop sa natigayong buy-bust operation sa Yumang St., Brgy San Isidro ning siyudad.
Kasong pagsupak sa RA 9165 kon Comprehensive Dangerous Drugs Act of 2002 partikular na ang kabahin sa pagbaligya ug paghupot ug iligal nga droga ang atubangon sa nagpangalan ug Shiela Mae Lumapas, hamtong ang pangidaron, taga-Zone 2 Brgy Bula ning siyudad, ug higala niya nga si Vivien Grace Bautista, hamtong, residente sa Camella Homes.
Kahibaluan nga sakay ang duruha sa sikad gikan sa Brgy Bula ug padulong sa Brgy San Isidro dihang nakorner sa gipahigayong buy-operation sa Regional Police Drug Enforcement Unit (RPDEU-12), katambayayong ang mga sakop sa Bula ug San Isidro Police Station.
Positibong napalitan ang duruha ug usa ka sachet sa gituuhang shabu sa kantidad nga P500.
Gawas niini narekober usab sa kapulisan ang lain pang upat ka sachet sa gituuhang shabu nga may street value nga kapin P100,000.
Kahibaluan nga giangkon ni Lumapas nga gagamitan ug iligal nga droga, apan gihingusgan nga wala gabaligya.
Sa karon nagpabiling balhug sa selda sa Bula Police Station ang naasoy’ng mga dinakpan.
