GENERAL SANTOS CITY – Nagpadayon ang monitoring og validation nga ginahimo sa mga otoridad sa mga grupo nga adunay kalambigitan sa terrorist group sa Polomolok, South Cotabato.
Matud ni Police Lieutenant Redin Cuevas, ang deputy station commander sa Polomolok Municipal Police Station nga aduna gihapon report nga nadawat ang ilang istasyon kalabotan sa mga teroristang grupo nga galihokan og gaadto sa Polomolok hinungdan nga nagapahigayon sila og validation.
Hinuon, gisiguro sa opisyal nga nagpabilin ang kahapsay og kalinaw sa lugar luyo sa pagkamatay nilang Jourhan, financier sa local terrorist group nga Dawlah Islamiyah Katiba group og igsuon niining Mohaimeen Utap nga miembro usab sa maong terrorist group.
Target sa gisilbing warrant of arrest si Jourhan gumikan sa kalambigitan sa kasong murder, carnapping ug illegal drugs apan mikuha matud pa ug pusil ug nagsugod sa pagpamusil punting sa mga operatiba.
Una nang gikumpirma sa kapulisan sa South Cotabato nga may kalambigitan sa narekober nga mga armas sa Kapa-Community Ministry International ni Joel Apolinarion ang napatay nga si Jourhan.
Ang mag-igsuon ang tinubdan matud pa sa mga armas sa Kabus Padatuon.
Nasayran nga atol sa operasyon nakuha sa posisiyon sa mag-igsuong Utap ang usa ka caliber 45 pistol, .38 revolber og pipila ka sachet sa ilegal nga droga.
