GENSAN – Gipahigayon kagahapon Enero 7 ang ceremonial destruction sa mga nakumpiska nga ilegal nga pabuto, improvised boga ug illegal mufflers sa Camp Fermin G. Lira, General Santos City.
Gipangunahan ang kalihukan ni PCol. Nicomedes Olaivar Jr., City Director sa General Santos City Police Office (GSCPO), isip kabahin sa padayong kampanya sa kapulisan batok sa ilegal nga pabuto ug uban pang delikadong butang.
Sumala sa kapulisan, ang kinatibuk-ang kantidad sa mga nakumpiska nga butang, nga naglangkob sa firecrackers ug motorcycle mufflers, gibanabana nga moabot sa ₱22,865.
Ang maong mga butang nakuha atol sa nagkadaiyang operasyon sa kapulisan isip kabahin sa kampanya sa PRO-12 aron masiguro ang kaluwasan sa publiko ug mapugngan ang mga insidente nga may kalabutan sa ilegal nga pabuto.
Matod ni PCol. Olaivar, ang ceremonial destruction usa ka klarong mensahe nga seryoso ang kapulisan sa pagpatuman sa balaod ug sa pagpanalipod sa komunidad batok sa posibleng peligro nga dala sa ilegal nga pabuto ug improvised explosive devices.
Giingon usab niya nga padayon ang ilang operasyon aron mapalig-on ang kalinaw ug kahapsay, ilabi na sa panahon sa mga selebrasyon.
Gipasiugda sa GSCPO nga ang kalihukan nagpakita sa panaghiusa sa kapulisan ug sa ilang mga kauban nga ahensya sa pagpalambo sa usa ka luwas ug firecracker-free nga palibot alang sa tanang katawhan sa General Santos City.
