Nagpagawas og hugot nga pahimangno ang Philippine National Police (PNP) ngadto sa ilang mga opisyales batok sa pag-apil sa partisan politics samtang gisugdan ang pagpakusog sa mga lakang sa seguridad alang sa 2025 election.
Matud ni PNP chief Gen. Rommel Francisco Marbil, ang PNP gitahasan sa pagpanalipod sa demokratikong proseso ug dili pag-apil-apil sa mga kalihukang pang politika.
Kahibaloan nga magsugod na ang filing sa certificates of candidacy (COC) ning adlawa, Oktubre 1 hangtod 8.
Matod sa hepe sa kapulisan, ang nasud hugot nga nag-obserba kung giunsa pagsiguro sa PNP ang kaluwasan sa publiko sa panahon sa eleksyon.
Giawhag niini ang publiko nga makig-alayon sa PNP sa panahon sa eleksyon ug i-report ang mga kahiwian nga naglambigit sa mga tigpatuman sa balaod.
Hugot usab nilang gipahimangno nga bawal ang mamulitika sa panahon sa filing sa COC.
