GENERAL SANTOS CITY- Gikatakdang magpagawas ug show cause order silang Sarangani Provincial Legal Officer Atty Edwin Torres ug Prosecutor Biajar aron patubagon ang kapitan sa Brgy Pangyan ug ang purok chairman nga nagpagawas sa istorya kalabot sa presensya sa mga armadong kalalakihan sa ilang lugar, kung asa daghan ang nagkanayon nga kadto mga miyembro sa ISIS, hinungdan nga namakwit ang mga residente.
Kini aron patubagon silang Kapitan Usman Salisipan sa Pangyan ug Chairman Michael Macani nganong dili sila angayang kasuhan ug inciting to sedition ug alarm and scandal.
Kahinumduman nga giangkon sa duruha nga hinimu-himo lamang ang istorya kalabut sa presensya sa mga armado sa kabukiran.
Kahinumduman usab nga daghan ang nag-panic nga mga residente, lakip na sa mga kasikbit nga lugar, hinungdan nga gialerto gilayon ang mga kasundaluhan ug kapulisan sa lugar.
Ug gani, gisusi ang mga lugar nga gikabutyag nga gitaguan sa mga nasampit nga armado, lakip ang mga residente nga matud pa gituktukan sa mga nasampit, apan nagnegatibo ug migawas nga pulos lamang mga istorya ilang nadunggan.
Matud ni Gov. Solon, ang gipagawas nga kamanduan ang aron dili na masubli ang susamang panghitabo.
