Nakakolekta ang lokal nga kagamhanan sa Manila og kinatibuk-ang P93,639,910.17 nga unpaid contractors’ tax gikan sa mga kontraktor sa flood control projects sa national capital.
Ang talaan sa Manila nagpakita nga 175 ka flood control projects ang aduna pay tax liabilities nga P127,277,404.23.
Matod ni Manila City Mayor Francisco “Isko” Moreno Domagoso, kini gikan sa kinatibuk-ang 315 ka mga proyekto nga natukod ug gitukod sa dakbayan sukad kaniadtong 2022 hangtod karon. Ang nahabilin nga 140 tanan tax compliant, base gihapon sa records sa LGU.
Ang pagsaka sa buhis sa mga kontraktor nga nakolekta niabot usa ka semana human nipasidaan si Mayor Domagoso sa mga kontraktor sa dakbayan nga aduna silay hiniusang P247 milyon nga wala mabayri nga buhis, kon dili, i-blacklist sila sa LGU.
Dihang nipagawas og pahimangno ang mayor, siyam lang ka mga proyekto nga nagkantidad og P8.09 milyon ang nituman.
Ang LGU nagpadala ug mga pahibalo ngadto sa mga kontraktor nga giila nga adunay mga utang sa buhis, uban usab sa tabang sa bag-ong gilusad nga Sumbong sa Pangulo nga website ug independent flood control monitoring sa Manila City.
Daghan kanila ang misunod dayon, samtang daghan pa ang wala matubag.
