GENERAL SANTOS CITY – Miabot na sa kapin 4,000 ka kaso sa dengue ang natala sa Department of Health sa Region 12.
Matud pa ni Jenny Panizales ang focal person sa dengue prevention program sa DOH 12, nakatala sila ug 4,025 ang kaso sa maong sakit sa tibuok rehiyon gikan Enero 1 hangtod sa Marso 30, ning tuiga.
Gikabutyag nga 178% kini nga mas taas itandi sa susamang panahon sa miaging tuiga nga anaa lang sa 1,449 ka kaso.
Samtang 13 na ang namatay tungod sa dengue, gikan sa kanhing lima sa miaging tuig.
Nanguna ang North Cotabato nga may labing daghang kaso sa dengue nga anaa sa 1,444 ka kaso, sunod ang South Cotabato nga anaa sa 1,196 ka kaso.
Ikatulo ang Sultan Kudarat nga may 480 ka kaso, sunod ang Sarangani nga may 385; GenSan – 323; ug Cotabato City – 197 ka kaso.
Hinuon, una nang gibutyag sa City Health Office (CHO) – GenSan nga kontrolado na ang pagtaas sa kaso sa dengue sa tulo ka mga barangay sa dakbayan nga gikonsidera nga mga hotspots area.
Matud pa ni Dr. Lalaine Colonzo sa CHO, kini mao ang Labangal, Fatima ug Calumpang.
