GENERAL SANTOS CITY – Hugtanong gikondena sa konseho sa Brgy Dadiangas South ang pagpusil-patay kang Jan Rafael Eco, anak ni Brgy Kag. Alvin Eco, sa natigayong buy-bust operation sa City Drug Enforcement Unit kon CDEU kaniadtong Lunes sa gabii, sa Tiongson St, Brgy Lagao.
Nagpasa ug resolusyon ang konseho sa Dadiangas South alang sa pagkondena sa insidente.
Nagpasa usab sila ug resolusyon nga aron ihangyo sa Sangguniang Panglungsod nga kinahanglang naak-video o may body cam ang mga operatiba sa matag operasyon nga ginapahigayon.
Gisugyot usab nila sa SP nga magpahigayon ug special investigation pinaagi sa National Bureau of Investigation kon NBI, aron maimbestigahan ang pagkamatay ni Jan Rafael.
Kahibaluan nga gibutyag sa CDEU nga misukol ug misulay matud pa ug sibat ang 22-anyos, hinundgan nga ilang giunhan ug tiro, butang nga hugtanong gipanghimakak ug gialmahan sa pamilya ug mga higala ni Eco.
Kahinumduman nga nakabsan na sa kinabuhi sa balay-tambalanan ang biktima kaniadtong Martes sa gabii, human madala sa ICU gumikan sa naangkon nga igo-pinusilan sa ulo.
Una nang gihingusgan sa CDEU nga lehitimo ang nasampit nga operasyon, ug gikabutyag nga andam muatubang sa unsa mang imbestigasyon.
