Misaad si Speaker Ferdinand Martin Romualdez nga padayon nga mahimong kaabag ni Pangulong Ferdinand “Bongbong” Marcos Jr. ang Kamara de Representantes sa pagsiguro nga adunay suplay sa barato nga pagkaon alang sa mga Pilipino.
Gihimo ni Speaker Romualdez ang pahayag isip reaksyon sa report sa Philippine Statistics Authority (PSA) nga mihinay ang inflation rate sa nasud sa miaging Setyembre sa 1.9 percent gikan sa 3.3 percent sa miaging Agosto og 4.4 percent sa miaging Hulyo.
Ang natala nga inflation rate sa miaging bulan ang labing ubos sa milabay nga upat ka tuig.
Gitumbok ni Speaker Romualdez ang nahimong desisyon sa Pangulo nga paubsan ang taripa sa pag-import og bugas gikan 35 percent ang gihimo na lamang kini nga 15 percent ug ang direktang pagbaligya sa baratong bugas sa gobyerno sa publiko pinaagi sa mga Kadiwa store.
Gibutyag usab ni Romualdez, ang mga nag-unang programa sa Pangulo – ang Bagong Pilipinas Serbisyo Fair (BPSF) og ang Presidential Assistance to Farmers, Fisherfolk and Families (PAFFF) – nga mibisita sa 24 ka lugar sa tibuok Pilipinas, nga nakahatag na og kapin P10 billion nga kantidad sa mga serbisyo sa gobyerno og hinabang pinansyal sa kapin 2.5 million nga pamilyang Pilipino.
Naglaum si Speaker Romualdez nga magpadayon ang paghinay sa inflation rate o matala kini sa labign ubos nga lebel sa target nga 2 hangtod 4 percent karong tuiga.
