GENERAL SANTOS CITY – Halos managsama ang pamahayag sa mga opisyal sa syudad og sa Sarangani nga nakalingkawas sa COVID 19.
Si Kagawad Odjok Acharon ang labing ulahing opisyal nga nakarekober sa maong balatian sa GenSan.
Una niini gibutyag usab ni Mayor Jun Sumbo sa Malapatan, Sarangani Province nga samtang kritikal ang iyang kondisyon nakit-an niya ang iyang mga namatay nga mga ginikanan.
Samtang mao usab ang pamahayag ni Kag. Acharon nga gihatagan siya og pagkaon sa mga ginikanan niini gumikan gigutom apan mibalibad.
Matud pa ni Kag. Acharon nga dili tiaw ang iyang gibati gumikan hapit na siya nga namatay.
Sa iyang pamahayag nga sa dihang gikuha siya sa ambulansya sa ilang balay og ihatud sa ospital wala kini nasayod basin mao ang ulahing higayon nga magkita sila sa ilang pamilya.
Lisod usab ang sitwasyon sa ospital gumikan walay makaduaw nga mga miyembro sa pamilya.
Gawas pa niini nga dili niya mailhan ang panagway sa mga doktor og nurses nga gaatiman kanila tungod nakasul-ob sa PPE.
Dungan niini hugot ang panawagan ni Kag. Acharon nga sundon ang tanang mga health protocols aron dako ang tsansa nga makalikay sa COVID 19.
