Gibalhin na ang kanhi broadcaster nga si Jay Sonza gikan sa kustodiya sa National Bureau of Investigation (NBI) sa Pasay City ngadto sa pasilidad niini sa New Bilibid Prison kagahapong adlawa .
Sumala ni Atty. Mark Tolentino, maayo ang panglawas ni Sonza ug padayon silang nagtutok sa mga legal nga lakang aron mapanalipdan ang iyang mga katungod.
Si Sonza gidakop niadtong Huwebes sa gabii sa Quezon City base sa warrant nga gi-isyu sa Pasay Regional Trial Court Branch 118.
Nag-atubang siya og mga kaso sa paglapas sa Article 154 sa Revised Penal Code, nga nagtumong sa ilegal nga paggamit sa mga paagi sa pagmantala ug ilegal nga mga pagsulti sa Cybercrime Prevention Act of 2012.
Kini may kalabotan sa giingong pag-post sa kanhing tigbalita og peke nga balita bahin sa kahimsog ni Presidente Ferdinand Marcos Jr. OFW Information Portal
Sa panahon sa iyang pagkadakop, si Sonza miingon nga andam na siya nga moagi sa hustong proseso.
Ang iyang abogado kaniadto miingon nga ilang kwestyonon ang pag-isyu og non-bailable warrant batok kaniya, nga iyang giingon nga “highly irregular” alang sa usa ka kaso nga may kalabotan sa ilegal nga pagmantala.
Dugang pa, si Sonza nag-atubang usab og laing kaso sa cyberlibel sa Pasay RTC Branch 111.
Gidayeg sa Presidential Communications Office (PCO) ang paspas nga aksyon sa National Bureau of Investigation (NBI) sa pagpasaka sa kaso ug pag-aresto sa kanhing broadcaster.
