Giaprobahan na sa Senado ang Senate Resolution 144 o ang hangyo sa Senado ngadto sa International Criminal Court (ICC) alang sa interim release o ang hangyo nga “house arrest” alang sa humanitarian consideration ni kanhi Presidente Rodrigo Duterte nga adunay boto nga 15 ang pabor, tulo ang supak ug 2 ang nag-abstain.
Lakip sa mibotar og NO mao sila si Senador Risa Hontiveros, Kiko Pangilinan ug Bam Aquino samtang sila Senate President Tito Sotto III ug Senador Raffy Tulfo ni-abstain o wala nibotar.
Ang resolusyon nag-ingon nga ang hangyo alang sa house arrest arrangement adunay kondisyon nga precedent nga itakda sa korte ug dili kini makabalda sa integridad sa ICC proceedings.
Si Senate Majority Leader Migz Zubiri, Senate Minority Leader Alan Peter Cayetano, Senador Jinggoy Estrada, Senador Joel Villanueva, ug mga senador sa Duterte bloc, Senador Bato dela Rosa, Bong Go, Robinhood Padilla, Imee Marcos, ug Rodante Marcoleta, nibarog sa plenaryo aron pag-sponsor ug pagpasabot sa panginahanglan sa pag-house arrest kang kanhi Presidente Duterte.
Matod ni Zubiri nga dili politiko ang iyang pagsuporta sa maong resolusyon kondili humanitarian tungod kay siya mismo adunay 85 anyos nga amahan nga nakasinati og mga problema sa balanse ug aduna usab dementia.
Gikumpara usab ni Padilla ang kahimtang ni FPRRD ngadto sa iyang inahan, 89 anyos na ug dementia, nga malimtanon ug huyang.
Sa laing bahin, si Senador Marcos miinsister nga dili partisan o self-serving kining maong hangyo sa kanhi presidente tungod kay mismo ang neuro psychiatrist sa ICC mikompirma nga nag-antos siya sa grabeng kakulangan sa panghuna-huna nga makaapekto sa iyang memorya, adlaw-adlaw nga kalihokan, ug orientasyon sa lugar ug oras.
Samtang gipasabot nila ni Hontiveros ug Pangilinan ang ilang pagsupak nga ipaubos sa house arrest ang kanhi presidente tungod sa kabug-at sa iyang mga aksyon sa kampanya batok sa ilegal nga droga diin liboan ka mga tao ang nangamatay.
