GENERAL SANTOS CITY – Dili kumbinsido ang sports writer ug analyst nga si Fred Lumba sa gipanaog nga desisyon ug silot sa FIBA Disciplinary Panel sa mga players sa Gilas Pilipinas ug Australia Boomers human sa nahimong kagubot atul sa natigayon nilang FIBA Qualifying Game sa Philippine Arena kaniadtong Hulyo 2.
Kahibaluan nga 10 ka players sa Gilas ang gipahamtangan ug managlain nga silot sama sa game suspension, samtang tulo ka players usab gikan sa Australian team.
Sa pakighinabi sa Bombo Radyo, gibutyag ni Lumba nga imbes nga individual sanction, mas maayong sweeping punishment kon alang lang sa tibuok team ang silot sama sa one year ban sa FIBA games aron makakat-on ug leksyon.
Bisan matud pa ug adunay mga wala miapil ug sumbag o bugno, gumikan kabah in sila sa usa ka team, angayang ang tibuok team gayud ang panubagon.
Sumala pa nga daw sa binuang lang ug walay epekto sa matag team kon isuspinde ug pipila ka dula ang mga players, hinungdan nga pwede pang ilisan ang mga players, sama kang Terrence Romeo nga may three-game suspension, apan pwedeng hulipan ni Marcio Lassiter, o sa uban pang maayo usab nga players nga walay sanction, ingon usab sa bahin sa Australia.
Dungan niini, gibasol ni Lumba ang nahitabong kagubot sa mga referee ug opisyal sa FIBA nga nag-officiate sa dula kaniadtong tungura, gumikan wala matud pa nakontrola ang sitwasyon ug dili ang mga Pinoy o ang SBP nga igo lamang naghost.
