Gipasiugda sa House prosecution panel nga ang nagpadayon nga proseso sa impeachment trial batok kang Bise Presidente Sara Duterte dili angay nga malangan o maapektuhan sa bisan unsang kagubot sa liderato sa Senado.
Sumala ni Lanao del Sur Representative Zia Alonto Adiong, tigpamaba sa panel, ang ilang bugtong tinguha mao ang hingpit ug tukma sa panahon nga presentasyon sa mga ebidensya ug mga saksi atubangan sa impeachment court sa Senado.
Gipasabot ni Adiong nga ang katawhan adunay katungod nga mahibal-an ang mga ebidensya, ug ang bise presidente adunay katungod usab nga dili malangan ang husay.
Dugang niya nga ang impeachment usa ka pruweba nga walay opisyal, bisan unsa pa kataas ang iyang posisyon, ang immune gikan sa tulubagon ubos sa Konstitusyon.
Kini nagsunod sa mga taho nga ang minority bloc sa Senado nagplano nga iduso si Senador Sherwin Gatchalian aron pulihan si Senate President Alan Peter Cayetano, kinsa bag-o lang milingkod sa katungdanan niadtong Mayo 11.
Si Adiong miingon nga ilang giisip ang isyu sa liderato nga usa ka “internal dynamics” sa Senado ug nga gitahod sa House ang lahi nga institusyon.
Gikatakdang isumite ni Duterte ang iyang tubag sa Articles of Impeachment sa Hunyo 1, 2026 samtang ang Senado temporaryong nagtakda sa pagsugod sa pre-trial proceedings sa Hulyo 6, 2026.
