Karong adlawa, Abril 3 alas 10:00 sa buntag takdang ipahigayon ang ikaduhang pagdungog sa Senado kalabotan sa pagdakop og pag-turnover kang kanhi Pangulong Rodrigo Roa Duterte sa International Criminal Court (ICC).
Ang maong Senate hearing ang ipahigayon sa komite ni Sen. Imee Marcos.
Apan mibalibad na ang Palasyo sa imbitasyon sa Senado kabahin sa pagtambong sa mga executive official sa maong pagdungog.
Sa usa ka sulat nga gipadala sa Malacañang kaniadtong Marso 31, 2025, gibutyag nga gipatambong na nila ang pipila ka mga opisyal sa nagkadaiyang government agencies sa unang hearing sa Senado kaniadtong Marso 20.
Sa maong higayon daghan na matod pa sila og nahatag nga mga impormasyon nga kinahanglan sa gihimong Senate hearing.
Gawas pa niini gibutyag sa Malacañang nga adunay upat ka petisyon nga gisang-at og kasamtangang pending sa Supreme Court.
May kalabotan ang mga petisyon sa pagdakop sa kanhi Pangulong Duterte.
Tungod niini, mahimong musupak sa subjudice rule sa mga natanggong nga petisyon ang pagtambong sa mga opisyal.
