Maghimo og desisyon karong adlawa ang Appeals Chamber sa International Criminal Court (ICC) may kalabotan sa apela ni kanhing Presidente Rodrigo Duterte bahin sa isyu sa hurisdiksyon sa kaso batok kaniya.
Sumala sa taho ang lima ka miyembrong Appeals Chamber magpahibalo sa ilang desisyon sa open court karong alas-11 sa buntag sa The Hague (mga alas-5 sa hapon sa Pilipinas).
Naghangyo si Duterte nga dili na siya motambong sa pagbasa sa desisyon ug iyang gipakita ang representasyon sa iyang mga abogado pinaagi sa waiver. Sa pagkakaron, wala pa gihapon gi-isyu ang desisyon sa maong hangyo.
Ang apela sa iyang kampo naggikan sa desisyon sa ICC Pre-Trial Chamber I nga nagbasura sa ilang pagkuwestiyon sa hurisdiksyon sa korte sa mga kaso batok kaniya. Giingon sa pre-trial chamber nga ang ICC nagpabilin og hurisdiksyon sa alegadong crimes against humanity nga nahitabo sa Pilipinas sa panahon nga miyembro pa kini sa ICC.
Apan sa apela sa depensa, giingon sa mga abogado ni Duterte nga nasayop ang desisyon sa Pre-Trial Chamber tungod kay giila nila nga ang isyu sa Pilipinas giisip na nga “under consideration” bisan pa sa pag-withdraw sa nasod gikan sa ICC niadtong 2019.
Gilauman nga mahimong dako ang epekto sa desisyon sa Appeals Chamber sa padayon nga proseso sa kaso.
