Giaprobahan sa International Criminal Court (ICC) Trial Chamber III ang pag-freeze sa kwarta nga nakumpiska gikan kang kanhi Presidente Rodrigo Duterte human siya gidakop ug gidala sa kustodiya sa international tribunal niadtong Marso 2025.
Kini human ang prosekusyon nangayo og access sa iyang personal nga mga gamit ug pag-freeze sa bisan unsang kwarta nga dala sa kanhi presidente.
Base sa mga dokumento nga gipagawas sa ICC niadtong Biyernes, Hunyo 27, 2026, gipaboran sa korte ang mosyon sa prosekusyon nga ipadayon ang pag-freeze sa bisan unsang kantidad nga nakuha gikan kang Duterte atol sa iyang pag-aresto.
Gikuwestiyon kaniadto sa kampo ni Duterte ang lakang sa Trial Chamber III.
Sumala sa depensa, dili na kinahanglan nga mohimo ang prosekusyon sa ilang hangyo tungod kay ang maong kwarta naa na sa kustodiya sa ICC Registry.
Giinsistir usab nila nga kini walay epekto sa nagpadayon nga hearing sa kaso.
Wala gibutyag sa ICC kung pila ka kwarta ang nakumpiska gikan sa kanhi presidente.
Samtang, ang prosekusyon nangayo usab og access sa ubang mga butang nga nakumpiska gikan kang Duterte atol sa iyang pag-aresto.
Samtang wala mosupak ang depensa sa pagsusi sa pipila sa mga nakumpiska nga butang, ang abogado ni Duterte nga si Atty. Peter Haynes, mihangyo nga dili tugutan ang prosekusyon sa pagsusi sa mga yawe ug uban pang personal nga mga butang nga anaa karon sa kustodiya sa ICC Registry.
Sumala sa depensa, ang prosekusyon walay igong basehan aron i-link ang mga yawe sa giingong mga krimen nga giimbestigahan o sa bisan unsang kabtangan nga may kalabotan sa kaso.
Giinsistir usab niini nga walay pagpangita nga mahimo aron lang makit-an ang ebidensya nga magpakamatarong sa kaso.
Gihangyo usab sa kampo ni Duterte nga kung tugutan ang pagsusi sa ubang nakumpiska nga mga butang, sigurohon sa prosekusyon nga ang personal nga impormasyon sa kanhi presidente ug sa iyang pamilya nga wala’y kalabotan sa nagpadayon nga imbestigasyon mapanalipdan.
