Posibleng magpahigayon og regular nga press briefing ang House prosecution panel kung magsugod na ang impeachment trial batok kang Vice President Sara Duterte.
Sumala ni panel spokesperson Zia Alonto Adiong, gitun-an na sa mga prosecutor ang posibilidad sa maong lakang isip kabahin sa information campaign aron masabtan sa publiko ang mga panghitabo sa pagdungog.
Tumong usab sa panel nga malikayan ang kalibog sa mga legal nga isyu nga naglibot sa tibuok proseso.
Gilauman sa panel nga mahimong taas ang serye sa mga pagdungog ug siguradong tutokan kini sa publiko.
Gawas sa media, gusto usab sa panel nga direkta nga makig-estorya sa publiko ug matubag ang ilang mga pangutana.
Sa pagkakaron, gitun-an pa sa panel ang eksaktong porma sa mga briefing diin gustong makahatag sa mga prosecutor og regular nga updates, pagpasabot sa mga proseso, projection, ug dagan sa kaso, ug uban pa.
Matod pa niya, nasayod ang mga prosecutor sa dako nga interes sa publiko ug gusto nilang mapadayon kini pinaagi sa regular nga pagpahibalo sa impormasyon.
