Gihulagway sa House prosecution panel nga diversionary tactic lamang ang paghisgot sa kampo ni Vice President Sara Duterte bahin sa posibleng no-election scenario sa 2028 samtang nagpadayon ang impeachment trial batok kaniya.
Gihagit ni House impeachment prosecutor ug Manila Representative Joel Chua si Atty. Paolo Panelo Jr., tigpamaba ni Duterte, nga pamatud-an ang iyang alegasyon imbes magpagawas og mga isyu nga walay kalabotan sa paglilitis.
Matod ni Chua, mas maayo nga tubagon na lamang sa depensa ang mga alegasyon batok sa Bise Presidente imbes maghisgot og ubang isyu nga makalihis sa atensyon sa publiko.
Miuyon usab niini si House prosecution spokesperson ug Lanao del Sur Representative Zia Alonto Adiong, kinsa nagkuwestiyon sa timing sa pagpagawas sa maong alegasyon samtang naglisod kuno ang depensa sa pagpanghimakak sa mga ebidensyang pinansyal batok kang Duterte.
Matod ni Adiong, posibleng pagsulay kini nga ibalhin ang atensyon sa publiko gikan sa impeachment trial, ilabi na kay wala pa kuno makapresentar ang depensa og testigo nga makapamatuod nga sayop ang ebidensya sa prosekusyon.
Giatubang ni Duterte ang nahibiling impeachment charge ubos sa Article II, nga may kalabotan sa giingong 817.87 milyong pisong unexplained wealth ug gidili nga pag-apil sa negosyo gikan 2022 hangtod 2025.











