Gimando ni Senate committee on women, children, family relations and gender equality chairman Senador Sherwin Gatchalian ang pag-isyu og subpoena aron mapugos si kanhi Bamban Mayor Alice Guo sa pagpagawas sa mga rekord sa mga nadiskubreng check disbursements nga nagkantidad og P1.1 billion gikan sa iyang accout.
Dugang pa ni Gatchalian nga dili mapaklaro ni Guo ang check disbursement gikan 2018 ngadto sa 2024 kon ang maong kantidad gigamit sa pagtukod sa Philippine Offshore Gaming Operations (POGO) hub.
Sa nasangpit nga pagdungog, pila ka higayon nga giinsister ni Guo nga ang maong kantidad maoy gigamit sa pagpatukod sa iyang umahan.
Dili usab masulti ni Guo kon asa gikan ang kuwarta ug asa kini naadto.
Gisiguro usab kaniya ni Guo nga iyang ihatag ang record nga gipangita sa komitiba ug dili na niya kini matubag sa hearing tungod kay nag-atubang na kini sa kaso sa Anti Money Laundering Committee nga 87 ka ihap sa money laundering.
