GENERAL SANTOS CITY – Nagsubo karon ang kinatibuk-ang General Santos City Police office sa kamatayon sa usa sa ilahang kauban nga si Patrolman Benjamin Difuntorum III.
Si Pat. Difuntorum III nga naka-assign sa City Mobile force Company, residente sa Koronadal City namatay sa engkwengtro tali sa duha ka mga gun for hire.
Gipahigayon sa kapulisan ang hot pursuit operation sa Purok Masagana, Barangay Baluan ning syudad sa Gensan aron dakpon ang gitudlong duha ka suspek sa pagpatay sa usa ka babayeng negosyante nga si Didith Reyes Alenjandria.
Matud kang City PNP Director Police Col. Nicomedes Olaivar Jr. nga gipakita ni Difuntorum ang iyang kaisog sa pagpatuman sa iyahang trabaho aron lang nga mahatagan ug hustisya ang kamatayon sa biktima.
Ang mga napatay nga suspek giila nga silang Jessie Semini alyas “Bulldog”, ug laing alyas “Tagre”.
Sa karon gipahiluna na ang patay lawas sa nahisgutang pulis samtang naka half-mast karon ang bandera sa General Santos City Police Office tungod sa kamatayon niini.
Nasayran nga naigo sa ilok sa tuo nga bahin ang nasampit nga pulis.
