GENSAN- Gikompirma ni Police Colonel Nicomedes Olaivar Jr., City Director sa General Santos City Police Office (GSCPO), nga adunay 1,148 ka kapulisan nga aktibong nagserbisyo sa dakbayan.
Ang maong ihap sa mga pulis gilangkuban sa mga na-deploy sa napulo ka police stations, City Mobile Force Company, Traffic Enforcement Unit, ug Mobile Police Unit nga matag usa adunay kanya-kanyang responsibilidad sa pagpatuman sa balaod ug pagmintinar sa peace and order sa nagkalain-laing barangay sa syudad.
Gipasabot ni Olaivar, epektibo ang ilang gipakusgan nga police visibility nga ginahimo sa 24-oras o round-the-clock basis. Adlaw-adlaw dili muubos sa 60 ka mga indibidwal ang nadakpan tungod sa nagkalain-laing bayolasyon, lakip na ang paglapas sa mga lokal nga ordinansa, traffic violations, ug uban pang kalapasan sa balaod.
Dugang pa ni Olaivar, gawas sa padayong police visibility, ginapahigayon usab ang regular nga checkpoint operations ug intelligence-driven police operations aron mapugngan ang posibleng pagbuhat og krimen ug masakmit ang mga iligal nga butang sama sa armas ug droga.
Ang ilang estratehiya, sumala pa kaniya, nagpunting sa pagpugong sa krimen.
