GENSAN– Gipahinumdoman sa mga otoridad sa General Santos City ang kamahinungdanon sa kaluwasan sa dalan atol sa pagsaulog sa Semana Santa 2026 pinaagi sa pagpagawas og “Road Safety Tips” alang sa tanang motorista ug biyahero.
Sa maong pasidaan, gidasig ang mga drayber nga magpabilin sa tuo nga lane o “keep right” aron mapadagan ang hapsay nga dagan sa trapiko ug malikayan ang disgrasya, ilabi na sa mga dalan nga daghan og sakyanan.
Gipasabot usab nga kinahanglan magpabiling kalmado ang mga nagmaneho ug likayan ang pagbiyahe kung gikapoy o gibati og kalipong, tungod kay kini makadugang sa risgo sa aksidente sa dalan.
Gipasiugda usab ang kamahinungdanon sa pagsusi sa kondisyon sa sakyanan sa dili pa mobiyahe, lakip na ang pagtan-aw sa preno ug ligid aron masiguro nga andam kini sa layo o taas nga byahe.
Dugang pa, gipahinumdoman ang publiko nga sundon ang tanang balaod sa trapiko, sama sa paghunong sa pula nga suga, aron malikayan ang peligro ug maprotektahan ang kinabuhi sa tanan.
Sumala sa mga otoridad, kini nga kampanya kabahin sa ilang padayon nga paningkamot nga mapakunhod ang aksidente sa kadalanan atol sa Semana Santa, diin gilauman ang pagdagsa sa mga biyahero nga mopaingon sa lain-laing destinasyon.
