GENSAN- Gikumpirma ni Marfin Tan, usa ka fishing magnate dinhi sa siyudad, nga grupo sa mga golfer, negosyante, ug may scuba divers ang mga pasahero sa motor banca nga “Amejara” nga naunlod sa may bahin sa kadagatan sa Sarangani Davao Occidental.
Sa usa ka exclusive interview sa Bombo Radyo GenSan, gibutyag ni Tan nga si Christopher Bulig pa lamang sa karon ang naluwas human nabangalan sa mga mananagat sa Balut Island.
Gisaysay ni Bulig, ang survivor, nga alas 5:00 sa hapon sa Biyernes, Enero 16, 2026, nakasinati na sila og dagkong balud apan nagpadayon gihapon sa ilang paglayag.
Pagka-alas 4:00 sa kaadlawon sa Enero 17, kalit lang nitakilid ang motor banca, hinungdan nga naratol ang mga sakay ug nag-unhanay sa pagsaka sa second deck hangtod hingpit nga naunlod.
Gikan sa grupo nga naggunit og pisi, si Bulig ug Herwin Tan ang mibulag ug milangoy aron makaluwas.
Gipahayag ni Tan nga ang grupo misakay sa vessel alang sa recreational fishing, apan delikado ang maglayag sa open seas tungod kay dili matagna ang kalit nga dagkong balud.
Wala usab silay kauban nga guide sa ilang paglayag, ug ang kapitan sa motor banca dili suweto sa kahimtang sa dagat sa Davao Occidental.
Nagpahimangno si Tan nga ang bisan unsang recreational vessel kinahanglan makakuha og clearance o permit gikan sa Maritime Industry Authority (MARINA) sa wala pa maglayag aron masiguro ang kaluwasan sa mga pasahero
