Padayon ang hugot nga ensayo sa Gilas Pilipinas sa Pampanga bisan pa sa dili maayong panahon, isip preparasyon sa umaabot nga FIBA Asia Cup karong umaabot nga bulan sa Jeddah, Saudi Arabia.
Halos kompleto na ang roster sa Gilas, ug gihulat na lang ang pag-apil sa training camp silang June Mar Fajardo ug CJ Perez sa San Miguel, ug si Calvin Oftana sa Talk ’N Text. Ang tulo bag-o lang nakatapos sa finals series sa PBA Philippine Cup diin midaog ang San Miguel Beermen
Gilauman nga makasugod dayon sa ensayo ang tulo human sa ilang gimay nga pahulay gikan sa intense nga finals.
Anaa na sa training camp si naturalized player Justin Brownlee, nga maayo ang kondisyon human sa operasyon nga iyang giagian sa Amerika.
Apil na pud sa grupo si Kevin Quiambao nga bag-o lang usab nibalik gikan sa serye sa mga training camp sa Amerika alang unta sa iyang tumong nga makasulod sa NBA Summer League.
Nakit-an usab ang presensya nilang Scottie Thompson, Chris Newsome, Dwight Ramos, Carl Tamayo, Jamie Malonzo, AJ Edu, Japeth Aguilar, Troy Rosario ug RJ Abarrientos.
Gisiguro usab ni Gilas head coach Tim Cone nga makab-ot ang hustong preparasyon pinaagi sa usa ka viewing session, diin ilang gisusi ang mga galaw ug estilo sa mga kontra nga ilang maatubang sa torneo.
Sa wala pa ang ilang paglarga pa-Jeddah, nakaschedule ang Gilas nga makadula sa usa ka friendly game batok sa Macau Black Bears nga magsilbi usab nga send-off match alang sa team.
