Mainiton nga gipakita sa mga taga-General Santos City ang ilang pagkama abi-abihon ug pagkamadasigon pinaagi sa pagpatilaw sa mga delegado sa Batang Pinoy 2025 og pinaka lab-as nga tuna dishes nga gilangkuban sa sashimi ug sinugbang isda.
Ang maong panihapon gipahigayon sa West Central Elementary School, diin gipahimutang ang pipila ka mga delegasyon gikan sa Caloocan, City of Manila, Mandaluyong, Dagupan, Las Piñas, Malolos, La Union, ug Marikina.
Sumala sa mga host, ang maong kalihokan usa ka paagi sa pag-abi-abi sa mga bisita ug pagpasigarbo sa pagkaon nga nagdala ug dungog sa siyudad isip “Tuna Capital of the Philippines.”
Gipasabot usab sa mga opisyales nga dili lamang kini usa ka panihapon, kundili simbolo sa pagkahiusa, panaghigalaay, ug kultura sa Gensan nga nagpasigarbo sa ilang katawhan ug kinaiyahan.
Ang tuna feast usa sa mga highlight nga kalihokan sa pagsugod sa Batang Pinoy 2025, nga naghatag sa mga atleta og makapahimuot nga kasinatian sa ilang pagbisita sa General Santos City.
