Andam na sa paghatag og igong seguridad ang General Santos City Police Office alang sa ipahigayon nga opening ceremony sa ika-87 nga Foundation Anniversary o Kalilangan 2026 sa Pebrero 23, 2026.
Matud ni Atty. Jong Gonzales, labaw sa Public Safety Office sa dakbayan, ginalauman ang pagdagsa sa katawhan sa Pioneer Avenue nga maoy sentro sa kadaghanang kalihokan sa selebrasyon. Tungod niini, mas gipakusgan ang koordinasyon tali sa kapolisan, Public Safety Office, traffic management unit, Bureau of Fire Protection ug uban pang force multipliers aron masiguro ang malinawon ug hapsay nga dagan sa maong kalihokan.
Sumala sa kapulisan, magdeploy og igo nga kapolisan sa palibot sa Pioneer Avenue ug mga kasikbit nga dalan aron magbantay sa kahapsay sa trapiko, crowd control ug paglikay sa posibleng krimen sama sa pagpangawat ug pagpanghilabot. Magbutang usab og mga police assistance desk ug first aid stations aron dali matabangan ang mga nanginahanglan og medikal nga atensyon o assistance.
Gipahimangnoan usab ang publiko nga magmatngon sa ilang personal nga mga gamit samtang motambong sa kalihokan ug mosunod sa mga ipatuman nga seguridad protocol. Gidasig ang tanang moapil nga magtinabangay sa pagmintinar sa kalinaw ug kalimpyo sa dakbayan atol sa selebrasyon.
Ang Kalilangan maoy usa sa pinakadako nga kalihokan sa General Santos City nga nagpakita sa kultura, panaghiusa ug kalamboan sa katawhan. Busa, hugot ang pagpangandam sa lokal nga kagamhanan aron masiguro nga ang ika-87 nga Foundation Anniversary mahimong malinawon, malampuson ug luwas alang sa tanang Gensanon ug mga bisita.
