Nagpasalig ang Department of Social Welfare and Development (DSWD) og dinaliang tabang alang sa pagpalubong sa mga pamilya nga namatyan tungod sa kusog nga linog nga nitay-og sa Sugbo.
Matod ni DSWD Assistant Secretary Irene Dumlao, gawas sa maong burial assistance, makadawat usab ang matag pamilya og ₱10,000 nga financial assistance gikan sa ahensya.
Sa pagkakaron, ang DSWD Field Office Central Visayas hingpit nga nagsusi ug nagtigom sa kinatibuk-ang ihap sa mga napatay sa ilang mga lugar nga gisakupan.
Sa pagkakaron, padayong nisaka ang ihap sa mga nangamatay, ingon man ang mga naangol ug missing tungod sa magnitude 6.9 nga linog nga miigo sa Central Visayas.
Matod sa DSWD, ang Probinsiya sa Sugbo gipaubos na sa State of Calamity. Kini aron mapadali ang pagpalihok sa mga ahensya sa gobyerno ug ang paghatag sa gikinahanglang tabang sa mga biktima sa linog.
Dugang pa ni Dumlao nga si Secretary Rex Gatchalian personal nga misuroy sa Sugbo aron direktang masaksihan ang sitwasyon ug mahibaw-an ang tanang panginahanglanon sa mga apektadong pamilya.
Siguruhon sa ahensya nga walay pamilya nga mabiyaan ug ang tanan makadawat og igong tabang gikan sa gobyerno.
