Mokabat sa P1 milyon ang magasto alang sa pag-ayo sa nadaot nga parte sa barko sa Bureau of Fisheries and Aquatic Resources (BFAR) human kini gibombahan og water cannon sa barko sa China Coast Guard (CCG duol sa Sandy Cay sa West Philippine Sea.
Gisaysay sa BFAR nga naguba ang port bow ug smokestack sa BRP Datu Sanday human kinig gibangaanan ug gi-bombahan ug water cannon sa barko sa China samtang nagahimo sila og routine maritime research sa maong dapit.
Sumala ni BFAR spokesperson Nazario Briguera, naguba ang unahan nga bahin sa barko hinungdan nga kinahanglan kini nga ayuhon , ug posibleng mokabat og libo-libo hangtod milyon ang magasto sa pag-ayo niini.
Bisan pa man sa kadaot sa barko, walay nasamdan nga personnel sa insidente ug nahuman gihapon ang ilang research mission.
Gikatakda nga iproseso ang tanan nilang nakuha nga samples ug magpagawas og komprehensibong resulta sa ilang panukiduki.
Samtang, bisan pa sa nagpadayon nga agresyon sa China, padayon gihapon nga ipatuman sa gobyerno sa Pilipinas ang ‘Kadiwa ng Bagong Bayanihang Mangingisda’ program aron matabangan ang mga mananagat sa West Philippine Sea.
