Nagpasalamat ang Department of Justice (DOJ) sa Court of Appeals human gimando ang freeze order sa mga kabtangan ni Kingdom of Jesus Christ (KOJC) Leader Apollo Quiboloy ug sa iyang kaubang akusado.
Sa 48-panid nga resolusyon, ang freeze order naglangkob sa mga bank account, propyedad, mga sakyanan ug bisan sa eroplano nga nakapangalan sa relihiyosong grupo ug sa Swara Sug Media Corporation nga nag-operate sa Sonshine Media Network International (SMNI).
Sa pagkakaron, duha ka warrant of arrest ang giatubang ni Quiboloy diin ang usa gipagawas sa korte sa Quezon City ug ang usa gipagawas gikan sa korte sa Pasig City.
Matod ni Remulla, dako kini nga butang taliwala sa pag-insulto ni Quiboloy sa sistema sa hustisya sa nasod tungod sa padayong pagtago-tago niini.
Dugang pa sa kalihim nga ang freeze order mao lamang ang unang lakang aron sa katapusan makab-ot ang kamatuoran ug hustisya.
