Nipasalig ang Bureau of Corrections (BuCor) nga ilang tabangan ang Muntinlupa City nga makab-ot ang pangandoy niini nga mahimong usa sa mga sports hub sa nasud.
Matod ni BuCor Director General Gregorio Catapang Jr., kabahin kini sa pagpakita sa ahensiya sa suporta sa pagpasiugda sa mga kalihokan ug paghatag ug kahigayonan sa paglambo sa talento sa mga residente sa dakbayan.
Kagahapon, gipahigayon ang Football Festival Exhibition Game nga nagpakita sa mga magdudula nga gihikawan sa kagawasan gikan sa New Bilibid Prison Minimum Security Camp.
Ang duwa gipahigayon sa Sunken Garden sa NBP Compound sa Muntinlupa City.
Si Muntinlupa City Mayor Ruffy Biazon niingon nga maglaom ug dugang sports facilities sa dakbayan nga makatabang sa saktong kalamboan sa kabatan-onan.
Matod ni Football Club Bilibid (FCB) manager Rafael Misa, hangtod karon nahimo na usab silang scholar gikan sa lainlaing unibersidad ug kolehiyo; ug aduna usab silay mga tinun-an sa high school nga ni-representar sa miaging Palarong Pambansa.
