Extorsyon, motibu sa pagpamanhig sa dumptruck sa constructor sa Sarangani

GENERAL SANTOS CITY – Extorsyon ang motibu sa pagpamanhig nga nahitabo sa dumptruck nga panag-iya sa Jargon construction nga nagresulta sa pagkasamad sa driver nga nadala sa tambalanan.

Gibutyag ni SPO4 Esrael Lantingan sa Alabel Police station nga gipara sa 20 ka mga armado ang dumptruck nga maneho ni Gerald Poblacion 34 anyos nga taga Mabuhay Norallah South Cotabato apan wala kini mihunong hinungdan nga girakrakan.

Naigo ang driver sa wala niini nga tuhod samtang luwas usab ang ubang sakay sa sakyanan.

Nasuta nga gikan sa dakbayan ang dumptruck nga muhatud unta ug graba sa Barangay Pag-asa Alabel, Sarangani apan giatangan sa gituhuan nga sakop sa New Peoples Army.

Narekober sa lugar ang 20 ka mga basiyo sa M16 armalite rifle.